Ci simu ghjunghjenu e feste di Natale ! Natale, cù a so schiera di rigali. Natale sta festa chi face spampillulà di i zitelli, chi face nasce tanti surisi, tante lacrime di gioia.
Ma, Natale à certi li face ghjunghje u pinseru, cù a so schiera di pene in capu è pena à u purtafogliu. Allora corre corre a vuciata, pare chi quist’annu Babbu Natale hà da esse bravu cù tutti, da u più ghjovanu à u più vechju, si dice chi stu Natale Duiemila è Sette hà da esse unu di i più belli dapoi ch’ellu esiste.
Perché ? ghjé simplice, uni pochi
d’affari anu da essse gratisi o anu da scambià ! Iè, ùn hè micca una fola, ùn vi vogliu micca dà sperenze false, l’aghju intesa, è vi faciu u riportu di cio chi hè statu dettu : »In accunsentu cù cio ch’ellu hà dettu u Presidente quand’ellu hè ghjuntu in vacanze ind’è noi l’ultima volta, tutti quelli chi so stati efficaci è capaci saranu premiati. Vene à di : Ch’ellu sia un impiegatu, ch’ellu sia un cliente, ch’ella sia a vostra moglia o u vostru maritu, s’ellu ùn ci hè nunda à di, li pudete fà un bellu rigalu per Natale o per l’annu novu.
Eccu dunque une poche di pruposte chi so state fatte :
- Sè voi avete travagliatu bè, u vostru patrone puderà cresce s’ellu vole a vostra paga
- Sè voi site un bon cliente è chè voi spendite assai, u cummerciante avarà a pussiblità di rigalavi :un ghjornu d’ingaratoghju gratisi, o una simana, forse un messe, da pudè firmavi davanti à u so magazinu, è entre à spende cio ch’ellu vi avarà datu u vostru patrone.
- Sè voi site un prufessore colmu di cuscenza, u vostru principale o pruvisore vi lasciarà e chjave di u stabilimentu, da pudè ci ghjunghje ancu a dumenica, da pruffittà di u silenziu di u vostru locu di travagliu.
- Sè voi site un bon pulizzeru, chè voi sciaccate un poche di cuntravenzione, u vostru capiserviziu, vi darà a pussibilità di fà ne altre tantu quand’è voi site di riposu ;
- Sè voi site un bon impiegatu di merria, chi travaglia pocu, avarete a pussibilità di piglià uni pochi di ghjorni di riposu, per u travagliu micca fattu è ancu di pudè apre una «paillotte» (un baraccone) l’estate chi vene,
- Sè voi site à a ritirata o pensiunatu, tuttu hà da esse crisciutu, ma cum’è i prezzi anu da cresce anch’elli, ùn camparete micca megliu.
- Sè voi site un elettore bonu è fidu, à u primu giru pudarete dui soldi o un impieghellu, è s’ellu vince u vostru canditatu una crescità di l’impositi.
- Sè voi site un bon merre, pudarete turnà à esse eletu, ma ci vulerà à tene e prumesse.
- Sè vois site candidatu è chè voi
perdite à l’elezzione, avarete u tempu à riflette à a vostra disfatta è di turnà à prisentavi.
- E per compie, sè voi vi vulete immarità, fatela, cusi a vostra moglia o u vostru maritu l’avarete vicinu à voi quandi voi a vulerete, ma ancu quand’i ùn la vulerete micca.
Quesse si, chi so nutizie bone, chi rallegranu u corre di l’omu (di e donne dino), allora aspittendu, un risultatu di ste pruposte, chè voi ne puderete apprufittà, vi auguru Bone Feste, Bon Natale è Pace è Salute per l’anu novu chi ghjunghje, è chè voi avarete sempre u piacè à leghje l’ultime nutizie di u vostru impennatore.

A prestu ! A quist’annu chi vene !