Caru Babbucciu Natale

Quand’è t’aghju scontru, uni pochi di ghjorni fà, nantu à u marcatu di Natale ( chì ogni annu diventa più bellu), mi ai lasciatu sente chì quelle « Notte di Frebbe » chì si passanu ogni fine d’annata anu da sparisce…
Aghju cercu tandu à capì è in li fatti avii a ragiò, sta sirata tantu aspittata ogni annu, campa a so ultima edizione ( È ghjè ancu più vera chì l’aghju letta nantu à u giurnale, è ellu bugie ùn ne dice micca, o mai. ).
Sta sirata - aspittata da assai ghjente, nostalgichi di l’anni ottanta è chì ùn vanu micca in discuttecca - hè senza tettu, si ritrova in piazza. Dì, chì sò parechji anni ch’ellu si dumanda una sala di spettaculi degna, chì possa accoglie manifestazione simule…
Tù, Babbucciu Natale, ùn poi fà nunda ? À u tantu cunnosci quelli chì anu decisu di « interdisce » sta manifestazione. Forse cù appena di « piston » … Aiò ! Fà un sforzu. Cusì quist’annu chì vene turnarà sta festa, chì ùn hà mai cunnisciutu storie, induva quellu chì affacca vene per passassi una stonda di gioia è di rise, senza gattivu spiritu, nè voglia di circà litiche.
Ti possu dì, caru Babbucciu Natale, chì ci sò ghjuntu anch’eiu à fà festa è puru ùn sò micca un acellu di notte. Ma quellu ambiu è u fattu di ritruvà ghjente ch’eiu ùn vecu cà una volta à l’annu, mi piace. Ti possu dì dinù, chì tutti quelli ch’eiu aghju scontru anu u listessu sintimu cà mè : « Hè un piacè di viutassi u ciarbellu, à u mancu una volta à l’annu, fendu festa à i ritimi musicali di l’anni ottanta ».
Mi anu ancu dettu : « In più di quessa l’urganisatori, sò sempre riisciuti à fà una prugramazione tocca di maccu ! » « Si scemu ! À a sirata In piazza Night Fever, mi sò amusata cum’è mai, en plus , aghju ancu trovu un tippu ! Parceque moi, in discuttecca, ùn ci vò micca, y a que des zitelli !! ».
Ancu si, per quist’annu si hà da fà festa cù Dave è i nipoti d’Abba .Tutti quelli chì anu intesu sta nutizia, si sentenu urfanelli d’una stonda di felicità.
Allora caru Babbucciu Natale, vogliu crede chè tù sarei capace di fà scambià l’affari !
Osinò, aghju da compie per crede chì quand’ellu ci hè calcosa chì viaghja, chì porta appena di culore in sti tempi scuri, ci ne sia sempre unu, per fà chì l’affari andessinu di male …
Hè vera chì di sparte a gioia cù l’altri po annarbà à certi ! Cum’è si, a felicità rendessi ghjelosu !
Sperendu nutizie bone, ti pregu UN FELICE NATALE è PACE è SALUTE per l’annu novu !

À prestu ! MIALINU

p.s : BONE FESTE, FELICE NATALE, PACE è SALUTE à tutti i lettori !!!